Американскиот софтверски гигант „Мајкрософт“ планира на почетокот од овој месец да затвори две негови Интернет страници за пребарување на библиографски податоци и да го пренасочи пребарувањето што се остварува преку неговиот пребарувач кон други сајтови.
„Мајкрософт“ исто така ќе им ги достави на издавачите и сите свои дигитализирани содржини - вкупно 750.000 книги и 80 милиони новинарски написи.
Аналитичарите наведуваат дека „Мајкрософт“ за да му се спротистави на својот најголем конкурент американскиот пребарувач „Гугл“, што во моментот во оваа сфера се наоѓа на првото место, ја започна големата кампања за дигитализација на книги.
„Мајкрософт“ во 2006 година го започна проектот „MSN book search“, чија намена беше да се спротистави на „Гугл“ преку понуда на дигитализирани книжевни дела на кои им истекуваат авторските права.
Аналитичарите наведуваат дека „Гугл“ не се двоумеше да објавува и книжевни дела со заштитени авторски права, што пак предизвика револт кај авторите.
Според аналитичарите ситуацијата по речиси две години е целосно поинаква, бидејќи „Гугл“ го потврди своето водство во областа на интернет пребарувањето, па затоа „Мајкрософт“ се откажува од натпреварот во оваа сфера.