Иако на пазарот на интернет пребарувачи сè уште нема напната борба, Internet Explorer-от на Microsoft и понатаму е неприкосновен владар. Но, работите во оваа индустрија значително се менуваат.
Експертите од компанијата Net Applications, поточно одделот кој се занимава со утврдување на уделот на одредениот производ или услуга на пазарот, секој месец известува за промените кои се случуваат. Изминатиот месец забележан е тренд на опаѓање на уделот на Internet Explorer, но исто така и на Firefox.
Според податоците на Net Applications за септември, Internet Explorer изгубил екстра 0,63 отсто од уделот во споредба со месец август. Сепак и покрај ваквиот тренд пребарувачот на Microsoft и понатаму е на првото место со 71,52 отсто од уделот. На второто место се наоѓа Firefox кој држи 19,46 отсто од пазарот, но исто и овој пребарувач забележа пад во споредба со месец август и тоа за 0,22 отсто.
Пораст на уделот забележал пребарувачот на Apple, Safari, и тоа за 0,28 отсто. Пребарувачот на Apple и понатаму се наоѓа на третото место на најупотребувани пребарувачи држејќи 6,65 отсто од пазарот. Пораст бележи и Opera и тоа за 0,07 отсто, што беше доволно за со својот удел од 0,69 отсто да се најде на петтото место.
Четвртото место останува резервирано за Google Chrome, кој според податоците на Net Applications држи 0,78 отсто од пазарот, но кој исто така бележи пад и тоа за нешто повеќе од еден отсто.
Од сето ова станува јасно дека и Firefox и Internet Explorer го губат својот удел на пазарот, за сметка на Safari и Opera, кои пак бележат пораст.