Британски конзерватори тврдат дека редок примерот на морско коњче со мала муцка е забележан во реката Темза.

Зоолошкото здружение од Лондон сметаат дека присуството на морските коњчиња во Темза е добар знак, односно дека се подобрил квалитетот на водата.

Иако конзерваторите веќе една година знаеле за присуството на морските коњчиња, тие чекале прво овие морски животинки да бидат ставени под заштита на британскиот закон за заштита на флората и фауната, па дури потоа да ја изнесат информацијата во јавност.

Алисон Шо, која раководи со здружението вели дека во изминатите 18 месеци неколку пати во Темза се регистрирани морски коњчиња.

„Ова покажува дека Темза постепено станува место на живеење на водниот свет. Сепак се уште не се знае колку се загрозени морските коњчиња со мали муцки, затоа што многу малку се знае за овој вид, особено во Велика Британија. Затоа секоја, па дури и најмала информација за нив е вредна“, вели Шо.