Научниците од шкотскиот универзитет Dundee откриле дека со арсенот може да се употреби за лекување на еден од облиците на леукемија.

Според податоците од истражувањето, објавени во стручното списание „Cell Biology“, лечењето со арсен може да биде делотворно кај пациентите со акутна промиелоцитна леукемија.

Според професорот Роналд Хеј, кој учествувал во истражувањето, откритието би можело да помогне во изнаоѓање на начин како овој отров да се примени при лекување на некои видови на рак.

„Со откривањето на специфичните молекули, успеавме да се насочиме кон создавање на делотворни лекови кои ќе помогнат во борбата против некои видови на рак, а притоа ќе се намали бројот на нус појави“, вели професор Хеј.

За сега тестирањата се вршат врз клетки од животинско потекло. Научниците со модификација на клетките, односно отстранување на одредени протеини откриле дека лекот кај овие клетки делува сосема поинаку. Исто така е утврдено дека арсенот им помага на некои видови на молекули (СУМО) да се спојат со протеините присутни при леукемија. Ензимот познат како RNF4 ги напаѓа СУМО молекулите и ги уништува протеините кои го предизвикуваат овој вид на леукемија.

„Откривањето на видот ма молекули кои учествуваат во овој процес, претставува чекор нанапред во разбирањето на овој комплексен парадокс, а тоа е на кој начин хемикалијата која го предизвикува ракот може да делува против истата болест?“ коментира доктор Лесли Вокер.

Според Вокер ова е големо научно сознание кое веројатно ќе придонесе за развој на лекови со кои успешно ќе се лечат одредени видови на леукемија.

(Д.Т)