Пирамидите од ѓубре, не само што ќе придонесат за намалување на бројот на депониите, туку ќе претставуваат и интересни туристички атракции и споменици, оценува Роелоф Шуилинг во студијата посветена на глобалните еколошки прашања.

„Овие пирамиди, кои ќе се подигаат на истакната места би можеле да претставуваат туристичка атракција, која ќе им носи дополнителен приход на државите, за разлика од другите споменици кои претставуваат товар, бидејќи постојано треба да се одржуваат“, вели Шуилинг.

Според холандскиот научник од истражувачкиот центар во Утерихт пирамидите ќе може многу полесно да се контролираат за разлика од подземните депонии кои денес се користат за складирање на токсичен отпад.

Шуилинг во написот за „International Journal of Global Environmental Issues“ предлага наместо да се става под земја, тврдиот отпад да се рециклира со што ќе се добие маса која ќе се користи за изградба на пирамидите, кои воедно ќе бидат споменик на општеството затрупани во смет.

Отпадот во овој случај би се мешал со цемент со цел да се избегне порозноста на пирамидите.

(Д.Т)