|
|
| Новиот комерцијален авион на пат кон Вселената (уметнички приказ) | |
Патувањето низ Вселената главно можевме да го искусиме преку добар научнофантастичен филм или книга. Но, сега таа возбуда и копнеж за нурнување во непознатото можат да станат наше искуство од прва рака, и тоа со до сега најдобриот комерцијален авион за вселенски патници. Доколку имаме 150 000 до 200 000 евра, се разбира. А тоа би ни го овозможил Астриум (Astrium), филијала на Европската компанија за астронаутска одбрана и вселена (European Aeronautic Defence and Space Company)
Новото, револуционерно возило за вселенски туризам беше претставено минатиот месец во Париз. Работи на млазен погод и собира четири патници, кои на висина од 100 km, горе, во Вселената, ќе ја имаат привилегијата да лебдат во бестежинска состојба повеќе од три минути. Претставена е макета во природна големина на предниот дел од леталото, кој ја вклучува и кабината, која е дизајнирана од Марк Њусон (Mark Newson).
Како изгледа патувањето?
|
|
| Високоиновативна кабината од возилото, наменета за 4 патници | |
Се полетува на вообичаен начин од стандарден аеродром. 45 минути се кружи до висина од 12 километри, кога се исклучуваат моторите на млазен погон и се вклучува системот на ракетен погон. Авионот се движи речиси вертикално со брзина 3 пати поголема од брзината на звукот. За 80 секунди се наоѓа на висина од 60 километри, а високоиновативните седишта во кабината самите се балансираат за да се минимизираат ефектите од забрзувањето и забавувањето, со што се обезбедува најголем комфор и безбедност. Системот на ракетен погон полека се исклучува и возилото користејќи ја својата инерција се искачува на 100 километри. Е, оваа е висината на која на патниците им се овозможува да искусат нулта гравитација во Вселената. Пилотот го контролира леталото користејќи помошни мотори и патниците лебдат во бестежинска состојба 3 минути и стануваат сведоци на најспектакуларни глетки на нашата планета Земја. По забавувањето за време на спуштањето, моторите на млазен погон се рестартираат за да се слета безбедно на нормален начин и на стандарден аеродром. Патувањето во целост трае околу час и половина.
Доколку изградбата започне во 2008 година, првиот комерцијален лет би се очекувал за 2012. Астриум предлага систем од еден степен, бидејќи се смета за најбезбеден и најекономичен за оперирање. Вакво возило, способно да функционира на висини помеѓу висината за авион (20 километри) и под таа за сателити (200 километри) може да е претходник на леталата за брз транспорт и брз пристап до Вселената, со што ни се отвораат претходно неистражени пространства, а воедно претставува и придонес кон одржувањето на европската компетенција во суштински технологии за вселенски транспорт. Астриум е лидер во глобалната индустрија за Вселената, со огромно искуство во изградбата на вселенски летала, орбитални системи, сателитски системи, боеви глави, опрема која наоѓа примена како за цивилни, така и воени цели.