Aстероидот Апофис и се заканува на Земјата
Астрономите мака мачат да ја утврдат траекторијата на астероидот кој ќе предизвика пустош, доколку во 2036 година ја погоди Земјата.
Џиновскиот метеор, наречен Апофис се движи низ вселената со брзина од 10 километри на секунда. Научниците предупредуваат дека ударот на астероидот би бил пострашен од атомската бомба која на крајот на Втората светска војна е фрлена врз Хирошима.
Во Звенигород опсерваторијата, во близина на Москва, научниците ги набљудуваат космичките тела и ги проучуваат метеоритите со цел да ја разберат нивата внатрешна структура и големина. Тие го следат движењето на Апофис. Се обидуваат да утврдат колкава е опасноста, но тоа ќе биде јасно за неколку децении.
„Критичниот момент ќе биде во 2029 година, кога Апофис ќе мине крај Земјата, тогаш и со голо око ќе може да се забележи. Последиците од неговото пролетување ќе ни кажат дали повторно ќе се врати и ќе се судри со нас во 2036 година“, вели астрономот Сергеј Барабанов.
Доколку Апофис помине низ една точка на вселената, позната како клучалка, тогаш гравитацијата на Земјата може да му го смени неговиот правец, што би било кобно за нас.
Во античката египетска митологија, Апофис бил духот на злото и деструкцијата, демон со изглед на змија кој се обидувал да го стави светот во вечен мрак. Ова име сосема му прилега на астероидот особено ако се земат предвид глобалните последици од неговиот удар.
Според НАСА, експлозијата која ќе ја предизвика Апофис при судирот со Земјата ќе биде 100.000 пати посилна од онаа што ја предизвика атомската бомба, фрлена врз Хирошима.
Засега, според експертите, единствено решение на овој проблем е да се испрати вселенски брод кој ќе успее да ја смени траекторијата на Апофис.
Научникот Анатоли Заитцев смета дека е неопходно да се направи планетарен систем за заштита.
„Нема поента да ги откриваме овие објекти, доколку не се заштитиме од нив. Исто така неопходни ни се подобра технологија и техника за опсервација. Тешко е да се следат објектите од земја, сметам дека изградбата на опсерваторија во веселата е најдобро решение“, вели Заитцев.
Во меѓувреме, Русија се понуди да лансира сонда која ќе постави радио трансмитер на Апофис. Трансмитерот би требало да придонесе за попрецизно следење на орбитата на астероидот.
(Д.Т)
|