Роботите кои се организираат во групи и кои се искачуваат по различни места, еден ден ќе можат да се користат за истражување на вселената и за опасни работи на Земјата, велат истражувачите. Тие сметаат дека група на меѓусебно поврзани роботи, се поадаптибилни и попаметни, од поединечните роботи.

"Веќе долго време, роботиката се фокусираше на создавање на "паметни машини", андроиди, кои можат да направат појадок или да купуваат наместо вас. Ќе биде многу полесно, доколку се насочиме кон поедноставни работи и се ослониме на тоа тие самите да научат да се организираат", вели др. Сет Булок, истражувач од University of Southampton.

Студентите од овој универзитет, создадоа прототип на роботи, кои можат да се организираат меѓу себе, без никаква контрола од некоја централна програма. Тие шетаат наоколу и комуницираат со помош на ист вид на инфрацрвена технологија, што се користи и за мобилните телефони.

Со помош на црвени и зелени светла се набљудувало, која од задачите роботите ќе изберат да ја извршат. Групата се поделила така што 80% биле со црвена боја, а 20% со зелена. Кога роботите кои биле со зелено светло биле ставени во друга просторија, исто така се поделиле со сооднос 80:20.

Ова може да биде корисно доколку се пратат за истражување на вселената, бидејќи без разлика колку од нив нема да успеат до крај да ја извршат мисијата поради некој технички проблем, сепак останатите ќе успеат да ја исполнат целта.

Исто така, сличен вид на роботи, наречени Sbot robots, се програмирани да се групираат во вид на синџири и заедно да извршуваат некои задачи. Тие имаат вграден софтвер кој се базира на самостојно учење и способност за адаптирање на различни ситуации, така што сами ќе имаат способност за одлучување.

Една од основните цели на истражувачите е да ги искористат овие роботи за помош на сателитите и вселенските станици. Исто така би можеле да бидат корисни и за некои работи на Земјата како градење на соларни фарми и други енергетски технологии.