Во извештајот на Еврокомисијата и Агенцијата, која е филијала на Светската здравствена организација во Европа, се вели дека глобалното затоплување најмногу ќе ги загрози европските планини, крајбрежјето, Медитеранот и Арктикот.

Просечната температура на воздухот во светот во однос на нивото пред индустриската револуција порасна за 0,8 степени Целзиусови, додека во Европа тоа зголемување е за еден степен, наведено е во истражувањето.

Доколку продолжат сегашните трендови, северна Европа до крајот на овој век ќе има многу повеќе дождови отколку порано, додека во регионот на Медитеранот ќе се зголемат површините на пустински предели. Топлотните удари во Европа, како оној од 2003 година кој предизвика смрт  на околу 70.000 лица, можат да станат честа појава, предупредуваат експертите.

Авторите на извештајот бараат, Европа да вложи повеќе труд за да може да се прилагоди на климатските промени. Во рамките на таквата акција, најмногу се инсистира за заштита на луѓето од болести кои ги пренесуваат инсектите, како и заштита на бреговите од зголемување на нивото на морето.

Досегашните мерки во европските земји,  пред се се однесуваа на спречување на поплави, во случај на зголемување на растот на нивото на речните текови, се наведува во извештајот.