IDIVIDI

E Martë, 13.05.2008

IDIVIDI Meny

IDIVIDI Fjalorë

Download

Shqip / Ballkan

Euleks fillon me aktivitete më 15 qershor

Prishtinë, 12 maj (MIA) - Përfaqësuesi special i Bashkimit Evropian për Kosovë, Piter Feith, pas takimit me kryeministrin e Kosovës Hashim Thaçi, tha se Misioni i EULEX-it do të jetë i pranishëm në Kosovë pas 15 qershorit, kur edhe hyn në fuqi Kushtetuta e Kosovës, njoftojnë mediat e kosovare.

Përfaqësuesi special i Bashkimit Evropian në Kosovë, Piter Feith, tha se Zyra Ndërkombëtare Civile do të jetë autoritet i posaçëm për zbatimin e Pakos së Ahtisarit, ndërkaq janë duke u diskutuar modalitetet për vendosjen e Misionit civil ndërkombëtar në gjithë territorin e Kosovës.

"Lexoni Kushtetutën dhe do ta shihni se pas 15 qershorit, Zyra Ndërkombëtare Civile do të jetë këtu si autoritet i posaçëm për të asistuar dhe për ta këshilluar Qeverinë dhe për të ndihmuar në implementimin e planit të Ahtisarit. Sa i përket EULEX-it unë nuk kam asgjë për të shtuar. Ju e dini se çfarë ka thënë Iv de Kermabo, se ne jemi duke diskutuar modalitetet për vendosjen e EULEX-it në gjithë Kosovën", tha Feith.

Kryeministri i Kosovës, Hashim Thaci, ndërkaq shpreson se me ndihmën e autoritetit të ri civil ndërkombëtar do të rritet edhe autoritetit i institucioneve shtetërore të vendit.

"Të gjitha përkushtimet janë të përbashkëta, suksesi është i përbashkët, kemi harmonizim të plotë në këtë proces prej institucioneve të Kosovës dhe autoritetit të ri civil ndërkombëtar, dhe natyrisht se do të rritet autoriteti i institucioneve shtetërore të Kosovës, me ndihmën dhe mbikëqyrjen për implementimin e dokumentit të presidentit Ahtisari dhe autoritetit ndërkombëtar ku do të punojmë bashkërisht me Piter Feith dhe të gjitha autoritetet tjera ndërkombëtare dhe me NATO-n", tha kryeministri Thaçi.

Lidhur me zgjedhjet në Serbi, Piter Feith tha se BE pret që të bashkëpunojë me qeverinë e re, e cila pritet të formohet së shpejti.

Ndërkaq, Thaçi shfaqi shpresën se pas këtyre zgjedhjeve do të formësohet mendimi i Qeverisë së re të Beogradit për njohjen e Kosovës shtet të pavarur.