Taçi vetëdorëzohet në policinë e TiranësTiranë, 5 nëntor (MIA) - Policia e Tiranës ekzekutoi sot vendimin e Gjykatës së Tiranës "arrest me burg" ndaj biznesmenit Rezart Taçi, kryetar i kompanisë së hidrokarburanteve "Taçi Oil".
Drejtori i Policisë së Tiranës, Tonin Vocaj, deklaroi se Rezart Taçi, 38 vjeç, lindur në Ersekë dhe banues në Tiranë, kryetar i kompanisë "Taçi Oil", i cili aktualisht ndodhet në dhomat e paraburgimit në policinë e Tiranës, u vetëdorëzua sot në orën 16.00 në ambientet e Drejtorisë së Policisë së Qarkut të Tiranës.
Sipas burimeve të Policisë së Tiranës, mësohet se Gjykata e Rrethit Gjyqësor Tiranë, me vendim nr.930, ka vendosur ndaj biznesmenit Rezart Taçi, (në mungesë) masën e sigurisë "arrest në burg" për konsumim të veprës penale të "goditjes për shkak të detyrës, e kryer në bashkëpunim".
Policia bëri të ditur se kryetari i kompanisë "Taçi Oli", Rezart Taçi, akuzohet se në datën 2 nëntor 2009, në bashkëpunim edhe me dy shtetas të tjerë (të cilët ndodhen të arrestuar), dyshohet se kanë goditur me grushta, në ambientet e lokalit "Kapricio", pranë ish-bllokut në Tiranë, gazetarin Mero Baze.
Sulmin e gazetarit Baze nga ana e biznesmenit Taçi dhe truprojeve të tij, e dënuan menjëherë krerët më të lartë të shtetit dhe të qeverisë shqiptare, presidenti i Republikës së Shqipërisë, Bamir Topi, kryeministri Sali Berisha, shoqatat e gazetarëve dhe gjithë opinioni publik, të cilët kërkuan nxjerrjen para ligjit të personave përgjegjës.
|