Prishtina po përgatitet për vizitën e sekretares Klinton

Prishtinë, 9 tetor 2010 (MIA) - Zyrtarë të lartë të Protokollit të Departamentit amerikan të Shtetit kanë ardhur në Prishtinë për ta përgatitur vizitën e shefes së diplomacisë amerikane, Hillari Klinton, e cila vjen më 13 tetor.

Të premten, një ekip i madh është marrë intensivisht me këtë çështje. Ekipi i sekretares Klinton është përcjellë nga zëvendësministrja e Punëve të Jashtme të Kosovës, Vlora Çitaku, gjatë një vizite që amerikanët i bënë Kuvendit të Kosovës, ku sekretarja amerikane e Shtetit pritet ta mbajë një fjalim, shkruan gazeta kosovare "Express".

Në një deklaratë në Uashington, sekretarja Klinton ka deklaruar se Qeveria amerikane, njëjtë si Bashkimi Evropian, është e gatshme të ndihmojë procesin e bisedimeve mes Kosovës dhe Serbisë.