Procesi i numërimit të votave në Tiranë ka ecur me një ritëm tejet të ngadaltë, duke u kthyer ndoshta në një nga pikat më të kritikueshme të këtij procesi zgjedhor.
Procesi është bllokuar thuajse në të gjitha KZAZ-të, ku shpesh herë komisionerët kanë kërkuar pushime të herëpashershme, duke e justifikuar atë me ngarkesën e punës dhe lodhjen.
Por ka patur edhe bllokime politike, si ato që ndodhën tek njësia numër 8 dhe njësia bashkiake numër 5.
Bllokime këto që detyruan Komisionin Qendror të Zgjedhjeve të urdhërojë me një vendim të vecantë për secilen KZAZ zhbllokimin e numërimit.
Të dhënat nga dy burime të ndryshme, ai i KQZ, i vënë nën akuzë nga socialistët për përzgjedhje selektive të informacionit dhe ai i PS, ndonëse raportonin shifra të ndryshme bashkoheshin në një pikë, në tendencën që nxirrte gati në një të tretën e qendrave të votimit në krye kryetarin aktual të bashkisë, Edi Rama përpara me vota ndaj kandidatit të mazhorancës Lulzim Basha.