Uashington, 7 tetor (MIA) - Presidenti i SHBA-së, Barak Obama sot me këshilltarët e tij të lartë do ta shqyrtojë strategjinë e ardhshme për Afganistanin, transmetuan agjencitë botërore.
Sot mbushen tetë vjet, nga fillimi i luftës, mes forcave të koalicionit, të udhëhequra nga SHBA-ja, që hynë në Afganistan disa javë pas sulmeve terroriste në Nju-Jork dhe Uashington më 11 shtator të vitit 2001.
Shtëpia e Bardhë ka kumtuar se Obama do të takohet me rreth 15 këshilltarë të tij të lartë, mes të cilëve janë edhe sekretarja e shtetit, Hilari Klinton, ministri i Mbrojtjes, Robert Gejts, këshilltari për siguri kombëtare, Xhejms Xhouns dhe komandantët ushtarakë.
Komandanti i forcave të SHBA-së dhe NATO-s në Afganistan, gjenerali Stenli Mekkristal, i cili javën e kaluar kërkoi përkrahjen e 40.000 ushtarëve, do të marrë pjesë në takim përmes lidhjeve me video konference.
Tani në Afganistan janë vendosur rreth 68.000 ushtarë amerikanë.
Obama dje e shqyrtoi strategjinë për Afganistanin me liderët e Kongresit.
Ligjdhënësit e Partisë Republikane, insistojnë për dërgimin e përkrahjes së dukshme në Afganistan, ku po përhapet kryengritja talebane. Republikanët paralajmëruan se presidenti nuk duhet ta ngadalsojë vendimin e tij.
"Është e qartë se koha nuk është në anën tonë. Duhet të veprojmë me shpejtësi të matur", tha senatori, Xhon Mekkejn, i cili ishte rival i Obamës në zgjedhjet prsidenciale të vitit të kaluar.
Udhëheqësi i shumicës demokratike në Senat, Hari Rid tha se ligjdhënësit e dy partive do të përkrahin presidentin pavarësisht nga vendimi i tij, transmetuan mediat amerikane.