Obama dhe Sarkozi ia uruan fitoren Janukoviçit në zgjedhjet presidenciale në Ukrainë

Uashington/Paris, 12 shkurt (MIA) - Presidentët e SHBA-së dhe  Francës, Barak Obama dhe Nikolla Sarkozi mbrëmë ia uruan fitoren në zgjedhjet presidenciale në Ukrainë, liderit të Partisë opozitare të Rajoneve, Viktor Janukoviç.

Siç kumtoi Shtëpia e Bardhë, në bisedën telefonike me Janukoviçin, Obama i ka dëshiruar sukses në kryerjen e funksionit presidencial dhe e ka përshëndetur "fazën e re pozitive në përforcimin e demokracisë në Ukrainë".

"Presidenti Obama dërgoi urime edhe deri tek ukrainasit për rrjedhën e qetë të zgjedhjeve më 7 shkurt. Shprehja e qetë politike e vullnetit të votuesve ukrainas paraqet fazë pozitive në përforcimin e demokracisë në Ukrainë", deklaroi zëdhënësi i Shtëpisë së Bardhë, Robert Gibs.

Ai theksoi se SHBA-ja me padurim pret që të fillojë të bashkëpunojë me presidentin e sapozgjedhur dhe ta përforcojë bashkëpunimin me Qeverinë ukrainase dhe liderët parlamentarë.

Janukoviç nga ana e tij ka deklaruar se marrëdhëniet e partneritetit në mes SHBA-së dhe Ukrainës po zvillohen mbi parimin e besimit dhe respektimit të ndërsjellë.

Në urimin deri tek Janukoviçi nga shefi i shtetit francez Sarkozi theksohet se zgjedhjet presidenciale paraqesin "fitore të demokracisë" në Ukrainë.

"Populli ukrainas e shprehu vullnetin e zgjedhjeve të lira, shumëpartiake dhe demokratike", theksohet në urimin me shkrim të Sarkozit deri tek Janukoviçi.

Janukoviç fitoi në raundin e dytë të zgjedhjeve presidenciale në Ukrainë, duke fituar 48,95 për qind të votave derisa për kundërkandidaten e tij, kryeministren aktuale ukrainase Julia Timoshenko, janë prononcuar 45,7 për qind e ukrainasve, të cilët e shfrytëzuan të drejtën e tyre për votim. Të pavlefshme janë 5,58 për qind e votave të tjera, kumtoi dje Komisioni qendror zgjedhor ukrainas pas përpunimit të 100 për qind të materialeve nga vendvotimet.