Shkup, 14 prill (MIA) - Për Maqedoninë dhe Shqipërinë integrimi në strukturat euroatlantike është alternativë e pazëvendësueshme për prosperitetin e mëtutjeshlm dhe stabilitetin e rajonit. Dy vendet kanë nivel të kënaqshëm të marrëdhënieve bilaterale të cilat i ndërtojnë nëpërmjet dialogut të hapur për të gjitha çështjet e interesit të ndërsjelltë, ndërsa fokusi në të ardhmen duhet të vihet në përmirësimin e bashkëpunimit ekonomik, vlerësuan presidentët e Maqedonisë dhe Shqipërisë, Gjorge Ivanov dhe Bamir Topi, pas takimit të sotëm në Shkup.
Presidenti Ivanov theksoi se Maqedoninë dhe Shqipërinë i lidhin shumë gjëra, mes të cilave historia e përbashkët, gjeografia, si dhe sfidat e përbashkëta në pjesën e reformave dhe transformimeve shoqërore.
"Segment i rëndësishëm në marrëdhëniet tona duhet të jetë bashkëpunimi ekonomik për të cilin vlerësoj se aspak nuk korrespondon me nivelin e marrëdhënieve politike, me mundësitë e të dy ekonomive dhe me faktin që jemi fqinj", theksoi Ivanov.
Ai shprehi pritje se në periudhën e ardhshme do të vazhdojë mbështetja e ndërsjelltë në planin e BE-së dhe NATO-integrimeve, sepse, siç shtoi, integrimi i të gjitha vendeve të rajonit do ta përforcojë stabilitetin e tij.
Duke folur për përfitimet nga liberalizimi i vizave, të cilat qytetarët e Maqedonisë tashmë po i ndjejnë, Ivanov shfaqi shpresë se së hpejti do të jenë të qasshme edhe për qytetarët e Shqipërisë, me çka do të mundësojë përparimin e saj si shtet demokratik, i lirë dhe i hapur.
Presidenti shqiptar, Topi theksoi se të gjithë duhet ta gëzojnë të drejtën e lëvizjes së lirë dhe se qytetarët shqiptarë së shpejti do të fitojnë regjim pa viza.
Ai e përshëndeti zbatimin e Marrëveshjes Kornizë të Ohrit, e cila kontribuon për zhvillim stabil të marrëdhënieve demokratike dhe për barazi të të gjithë qytetarëve të Republikës së Maqedonisë. Topi u bëri thirrje të gjithë faktorëve politik që të bashkangjiten drejt zbatimit të Marrëveshjes së verifikuar nga komuniteti ndërkombëtar.
Dy presidentët, në takim biseduan për disa çështje nga sfera e ekonomisë, për ndërtimin e Korridorit 8, hekurudhën dhe mbrojtjen e eko-zonës Ohër - Prespë.
Gjatë vizitës dyditëshe, presidenti shqiptar Bamir Topi do të takohet edhe me kryetarin e Kuvendit të Republikës së Maqedonisë, Trajko Veljanovski dhe me kryeministrin Nikolla Gruevski.
Topi do të ketë fjalim edhe para deputetëve në Kuvendin e Maqedonisë.
Shefat e dy shteteve, Ivanov dhe Topi, do të kenë fjalime përshëndetëse edhe në forumin e biznesit maqedono-shqiptar që do të mbahet nesër në Shkup, me qëllim që të intensifikohen marrëdhëniet ekonomike ndërmjet Maqedonisë dhe Shqipërisë.
Në axhendën e presidentit shqiptar janë edhe takimet me liderët e BDI-së, PDSH-së dhe DR-së, ALi Ahmeti, Menduh Thaçi dhe Ymer Selmani, si dhe me kryetarin e LSDM-së, Branko Cërvenkovski.
Delegacioni, i kryesuar nga presidenti Topi, do t'i vizitojë edhe komunat Tetovë dhe Dibër, ku pritet të shpallet qytetar nderi.