Filloi nënshkrimi i peticionit kundër raportit Dik Martit edhe në USHTTetovë, 11 janar 2011 (MIA) - Me thirrjen "Të nderuar studentë, nënshkruani kundër raportit të Dik Martit", në Universitetin Shtetëror të Tetovës ka nisur sot të firmoset peticioni kundër raportit të Dik Martit, thuhet në kumtesën e Zyres për informim pranë USHT-së.
"Raporti i Dik Martit për përfshirjen e drejtuesve të UÇK-së në trafiqe dhe në afera të paligjshme është i pabazë dhe si i tillë duhet të kundërshtohet", theksoi Merale Xhelili, studente e USHT-së, nënshkruese e peticionit të lartpërmendur.
"Ky dokument, i paraqitur nga europarlamentari zviceran në Këshillin e Evropës, kategorikisht duhet të kundërshtohet përderisa i njollos figurat historike të shqiptarëve dhe mbarë kombin tonë", deklaroi një student tjetër, i cili hodhi firmën e tij në peticionin kundër raportit të Martit.
Miftar Emini, përfaqësues i Parlamentit të Studentëve të USHT-së, i angazhuar për peticionin në fjalë konfirmoi se studentët e të gjitha fakulteteve të USHT-së, në Tetovë, si dhe programet studimore të disperzuara, prej sot kanë filluar ta nënshkruajnë këtë peticion dhe numri i tyre është i konsiderueshëm.
"Për të firmosur këtë peticion mjafton letërnjoftimi i çdo studenti, për t'u bashkuar me qindra studentë dhe profesorë që kanë firmosur këtë peticion edhe në USHT", tha Miftar Emini.
Organizatorët e peticionit bënë të ditur se peticioni kundër raportit të shpifur të Dik Martit në USHT do të nënshkruhet edhe gjatë ditëve në vijim dhe se nënshkrimet e grumbulluara do të dorëzohen në selinë e Këshillit të Evropës.
|