Овошјето како состојка во шампоните, балсамите и маските за коса може да направи чудо со вашата коса. Иако препаратите претежно содржат витамински коктели од различно овошје, не е лошо да знаете како одредени типови на овошје влијаат на вашата коса. Кивито го спречува нејзиното кинење и сушење, праската го враќа сјајот, јаболкото го спречува електрицитетот, кокосот регенерира, а калинката го спречува опаѓањето на бојата.

Киви против брчки

Во пролетниот и летниот период на вашето лице ќе му годи лесна, хидратантна крема, освежувачки тоник и хранлива маска. Според типот на кожата изберете препарати со екстракт од одреден вид на овошје. Имајте на ум дека екстрактот од киви придонесува за зголемено производство на колаген, ја освежува и хидрира кожата, а екстрактот од малина ги намалува брчките и ја матира кожата. И на кожата на усните им е потребна нега и затоа нахранете ја со балсам кој мириса на егзотично овошје.

Цитрусите ги затегнуваат нозете

По негата со препаратите со цитруси, повторно можете гордо да ги покажете своите нозе. Лосионите кои содржат екстракт од киви, цитрон и јаболка подлабоко ја хидрираат кожата, а со редовно користење придонесуваат за нејзино зацврстување, но истовремено ја прават поеластична и затегната. Масажата на нозете, од стапалото па се до препоните, со освежувачко масло на база на мандарина и авокадо веднаш ве релаксира, го отстранува чувството на тежина и замор и ја омекнува кожата. Препаратите со екстракт од лимон се идеални во борбата против прекумерното потење на стапалата и за елиминација на непријатните миризби.

(Д.Т)