Човечката кожа и натаму крие многу енигми. Неодамна, на пример, една група германски научници го открија механизмот со кој кожата, конкретно деловите што се наоѓаат на врвовите на прстите од раката, успева превентивно да се заштити од некои опасни бактерии каква што е ешерихија коли.

Тајната на овој механизам е во специјалниот протеин наречен псоријазин што ги убива бактериите така што го апсорбира цинкот, елемент неопходен за нивно преживување.

Ешерихија коли, инаку, е цело семејство бактерии од кои поголемиот дел не се опасни за човекот, но некои од нив се мошне опасни, бидејќи предизвикуваат труење на храната. Научниците од универзитетот во Киел за да ја откријат тајната како функционира овој превентивен процес бакериолошки ја анализирале водата со која група испитаници си ги миеле рацете, споредувајќи ја притоа со водата користена за миење на другите делови на телото. Изведувајќи ја анализата, тие биле зачудени дека во водата со која испитаниците си ги миеле рацете нема никакви траги од некоја од бактериите од семејството ешерихија коли дури ни во количества што обично се наоѓаат во примероци на човечка пот.