Европските научници заклучиле дека пушењето, покрај бројните здравствени ризици може да се поврзе и со губењето на слухот. Освен пушењето, студијата покажала дека и прекумерната тежина исто така претставува значаен ризик.

Истражувањето е спроведено во седум европски земји, а со него се опфатени над 4.000 лица на возраст од 53 до 67 години.

Студијата покажала дека еден од најголемите ризици за губење на слухот е изложеноста на бучава на работното место. Но, освен овој веќе познат фактор се покажало дека и прекумерната тежина и пушењето придонесува за губење на слухот. Пушењето и дебелината придонесуваат за  намалување протокот на кислород до увото, што може да придонесе за оштетување на слушниот апарат.

„Здравиот крвоток е пресуден за добро функционирање на увото, а сето тоа што влијае врз крвотокот, влијае и врз слухот. Губењето на слухот претежно се наведува како неизбежен процес на стареењето, но тоа не мора да биде така. Се чини дека здравиот животен стил може да придонесе за зачувување на добриот слух и во поодминатата фаза од животот“, изјавил Ерик Франсен, кој ја предводел студијата.

(Д.Т)