Пластичен хирург му даде нов живот на волонтерскиот пожарникар Патрик Хардисон, откако успеа да му пресади цело лице!
Лицето на Патрик изгоре во 2001 година откако тој влегол во запалена зграда да спаси жена, а во тој момент покривот паднал врз него. Подоцна се претпоставило, дека жената тогаш не ни била дома, туку била на риболов.
Донаторот бил 26-годишниот Њујорчанец Дејвид Родебаг, кој починал при велосипедска несреќа во Бруклин. Неговата мајка се согласила да го донира лицето нa нејзиниот син, велејќи им на болничкиот персонал дека тој отсекогаш сакал да биде пожарникар.
Д-р Едуардо Родригез, кој го предводел хируршкиот тим, извел една од најобемните операции на лице во историјата.
Тој морал да му направи 70 операции додека да стигне до трансплантацијата на лицето, која траела цели 26 часа. Трансплантацијата го опфатила неговиот череп и врат, но била изведена беспрекорно, без никакви лузни.
Патрик споделил како се чувствувал за време на тој тежок период.
- Бев речиси целосно слеп. Можев да гледам малку. Најтешко ми беше кога децата плачеа при мојата појава. Тоа е полошо и од тоа да умреш. Мислев дека ќе умрам така и дека ќе морам цел живот да го поминам без лице. Никогаш не мислев дека ќе седам овде по трансплантација на лице.
Моментално тој посетува физикална терапија, но се надева дека ќе си оди дома до крајот на оваа година.