Компанијата Stryker, месец дена откога добила одобрување од Агенцијата за храна и лекови (FDA), на научниот собир во американската асоцијација на невролошки хирурзи во Чикаго, го претставила нивниот 3D принтан имплант наречен Tritanium PL Posterior Lumbar Cage.
Според Stryker, Тританиумот е високо порозен титаниумски материјал дизајниран биолошки да се фиксира и да срасне со коскеното ткиво при аплицирање во р’бетот. Намената му е да помогне за намалување на проблемите предизвикани од дегенеративни болести на р’бетните дискови, кои како што старееме, се сушат и ги губат нивните способности за апсорбирање/амортизирање на удари – што предизвикува болки во грбот со различен интензитет.
Овие импланти можат да се принтаат со пори со дијаметар од 500 микрони, што и дозволува на коската на пациентот да расте околу нив, овозможувајќи нивна целосна интеграција со телото. Тританиумот, инаку, е тип на титаниумска легура, што значи дека е исклучително цврст и издржлив, способен да ги симулира механичките карактеристики на човечката коска.
Tritanium Posterior Lumbar Cage лесно може да се принта прилагоден кон анатомијата на разни пациенти, и ќе биде имплантиран преку заден пристап, за да се осигура дека нема да го оштети мускулното ткиво околу р’бетот. Геометријата на овој „кафез“ содржи големи странични прозорци и отворена архитектура која на докторите ќе им овозможи на рендгенски скенови и компјутерска томографија полесно да ја визуелизираат коскената фузија и раст, со што опоравувањето на пациентот лесно ќе биде следено.