Група научници од Универзитетот на Тексас успеаја да го клонираат вирусот зика, што претставува важен чекор во напорите за добивање на вакцина против инфекцијата што тој ја предизвикува, јавија американските медиуми.
Клонираниот примерок претставува копија на типот на вирусот кој е најраспространет во Јужна Америка.
Научниците сметаат дека со помош на клонираниот вирус можат да бидат инфицирани комарци, кои потоа би предизвикале инфекција кај лабораториските глувци. Овие експерименти би можеле да бидат клучни за производството на вакцина против зика, наведува стручниот магазин „Сел Хост енд Мајкроб“.
Во досегашните истражувања научниците успеаја да ја откријат структурата на вирусот, но ова е првпат тој да биде клониран во лабораториски услови.
Можноста за користење на клонираниот примерок на вирусот зика ќе придонесе и за унапредување и тестирање на ефектите на антивирусните лекови, сметаат научниците.