Истражувачи од MIT, University of Sheffield, и Tokyo Institute of Technology направиле капсула која откога ќе се проголта се расплеткува во стомакот и водена од надворешни магнетни полиња може да се користи за отстранување на објекти, затворање на внатрешни рани, или испорака на лекови.
Самата капсула е направена од сушено свинско црево (кое вообичаено се користи како обвивка на колбаси), поточно од биоразградлив материјал наречен Biolefin и малечок магнет. По голтањето, штом навлезе во желудникот, се расплеткува како оригами благодарејќи на киселините во него, по што станува функционална и може да се води до одредена локација. Расплетканиот уред има коцкеста форма на делови превиткана како хармоника, а се движи со помош на ротациски сили – со брза ротација се врти во место, а со бавна се превртува и ја менува позицијата.
Во демонстрацијата, еден ваков мини-робот се користел за отстранување на проголтана батерија од силиконски модел направен според механичките својства на свински желудник кој бил исполнет со вода и сок од лимон, со цел да се имитира киселоста на човечкиот желудник.
Нареден чекор е на овој робот да се додадат сензори кои ќе го контролираат и придвижуваат, без потреба од надворешно магнетно поле кое сега го прави тоа.