Англиски научници развиле нов материјал кој може да се внесе во забот и да го поправи и регенерира дентинот (ткиво на забот кое ја чини неговата основна структура.)
Новиот материјал, како и пломбите, би се внесувал во забот за да се затворат просторите каде што можат да се населат бактерии и би се стврднувал со UV светлина. Но штом е внатре во забот, тој би ги „охрабрувал“ матичните клетки да се размножуваат и израснат во дентин.
Иако има многу малку детални информации како оваа техника функционира, изгледа дека се работи за нова форма на „ограничување на пулпата“ (pulp capping). Тоа е техника која стоматолозите ја користат да ја запрат денталната пулпа од изумирање – таа е една од четирите главни компоненти на еден заб, покрај забниот емајл, дентин и цемент. Површинскиот емајл е најцврстиот слој на забот, под кој што се наоѓа вториот по цврстина слој, дентинот, кој што пак го обвива и се поврзува со пулпата на забот која е составена од сврзувачки ткива и клетки наречени одонтобласти, кои се наоѓаат во центарот на забот. Тука се наоѓаат сите крвни садови и нерви и е од исклучителна важност таа да не се оштети.
Проблемите започнуваат кога во забот ќе се развие празнина која го нагризува емајлот, дентинот и цементот (калцифицирана супстанца која го покрива коренот на забот) и ја експонира пулпата. Доколку таа итно не се заштити, следува исклучително болниот третман за отстранување на коренот.
Моментално материјалите кои се користат во оваа процедура се калциум хидроксид или MTA (Mineral trioxide aggregate), и тие само ја заштитуваат пулпата, но не обновуваат ниеден елемент од забот. Новиот материјал, покрај заштитата, го „тера“ забот да израсне дентин за дополнително да го заштити. Во суштина, овие пломби од биоматеријал би му овозможиле на забот самиот да се залечи.
Повеќе детали околу материјалот и студиите поврзани со него се очекуваат.