Реалистичен функционален протетичен екстремитет е поблиску до реалноста од кога и да е, благодарејќи на истражувачите од Универзитетот во Питсбург кои развиле мозочни импланти кои му овозможиле на парализиран човек да ги почувствува сензациите низ роботска рака.
Дваесет и осум годишниот Нејтан Копланд бил парализиран од градите надолу во сообраќајна несреќа во 2004-та, а во него биле вградени 4 мозочни импланти, лоцирани во регионите на мозокот одговорни за сетилата и моториката, секој со големина колку половина копче за кошула.
Според неговите зборови, тој сензациите некогаш ги чувствувал како електрични, а некогаш како притисок и тие биле многу природни. За жал, не можел да почуствува дали она што го допирал било топло или студено. Тој исто така бил способен да чувствува и кога конекторите од неговата глава биле поврзани со роботска рака, која што тој можел да ја контролира со мислите.
И покрај успехот на експериментот, одредени ризици се врзани со процедурата на инсталирање на имплантите – како на пример потенцијална инфекција на конекторите кои излегуваат надвор од скалпот. Поради тоа, нареден чекор би било тие да се елиминираат и уредите да бидат целосно безжични.
Иако е потребно да се поминат уште многу тестови врз луѓе додека оваа процедура стане достапна за сите, научниците предвидуваат дека технологијава би можела да биде имплементирана уште во наредната декада.