Мажите кои веќе немаат способност природно да постигнат ерекција тешко го доживуваат губитокот на здравата сексуална функција, но сега има нов простетички уред кој би можел да ја поврати.
Научници од Универзитетот во Висконсин, САД развиле егзоскелет за пенисот кој се активира со топлина и кој е изработен од меморискиот метал наречен нитинол – легура од никел и титаниум – кој ја менува формата во зависност од температурата на која што е изложен.
Идејата е да простетиката, откога ќе се имплантира во пенисот, остане во нејзината превиткана форма при нормална температура на телото. Но, кога за тоа ќе дојде потреба, загревајќи го имплантот тој ќе се сврдне и исправи во подолга форма.
Сегашните импланти користат разни пумпи или шипки кои помагаат на пациентите да постигнат ерекција, но овие стари технологии знаат да се тешки и непријатни за користење и потенцијално може да предизвикаат оштетување на ткивата.
Уникатните карактеристики на нитинолот го прават овој нов имплант многу пософистициран – супер еластичниот метал кој е легура која ја меморира формата може да ја „запомни“ оригиналната форма кон која се враќа кога е загреан – во овој случај тоа е исправената, цврста форма.
Инаку, топлината се аплицира врз него преку уред за далечинско управување на кој што моментално работат истражувачите, кој ќе биде потребно само да се приближи до пенисот за да преку индукција го загрее имплантот.
Потребно е уште многу тестирање за еден имплант од овој вид да стане комерцијално достапен, но научниците се надеваат дека доколку новите тестирања покажат дека е безбеден, тој би можел да се појави на пазарот во наредните 5 до 10 години.
Според тимот кој го има создадено имплантот, една третина од мажите со еректилна дисфункција стари помеѓу 40 и 70 години не реагираат на лековите од типот на Viagra, па така ваквиот имплант би имал огромна корист за нив.