Иако делува како научна фантастика, ова е можност која научниците ја истражуваат откога успешно создале здрави глувци користејќи процес наречен IVG ( ин витро гаметогенеза, т.е процес на создавање и созревање на полови клетки).
Во експериментите со глувците, научниците од матични клетки од кожата создале јајце клетки во почетна фаза, кои ги растеле во лабораторија. Штом созреале, тие ги оплодиле со глувчешка сперма и демонстрирале дека можат успешно да бидат имплантирани во женски глушец кој би служел како сурогат мајка.
Важно е да се наспомене дека оваа технологија е сè уште во зачеток. Креирање на јајце клетки од клетки од кожата е можност, но сега засега е далеку од употреблива кај луѓето.
IVG процесот е револуционерен во областите на медицината кои се занимаваат со плодноста, и на неплодните луѓе може да им даде надеж за потомство, особено оние кај што оваа состојба е предизвикана од третмани против некој вид на рак.
Оваа техника исто така би можела да се искористи за создавање на јајце клетки од машки матични клетки од кожа, со што би се овозможило создавање на деца кај истополови парови.
Тешко е да се предвиди кога и дали оваа технологија воопшто ќе биде спремна за користење кај луѓето, покрај останатото и поради мноштвото дилеми кои би ги предизвикала – на пример, благодарејќи на напредокот на технологијата за уредување на гените, би можеле да се создаваат „подобрени“ ембриони, дизајнирани според потребите на идните родители.
Исто така постои можност од создавање на „ембрионски фарми“ од кои потенцијалните родители би можеле да си бираат ембрион со одредени генетски карактеристики, што некои сметаат дека би ја намалило вредноста на човечкиот живот. А бидејќи бебињата би можеле да имаат три или повеќе генетски родители, тука треба да се земат в предвид законските права и одговорност на секој од нив.