Пејсмејкерите се уреди кои се имплантираат во градите на пациентот за третирање на аритмија, т.е неправилна работа на срцето.
Проблемот со нив е што за да функционираат потребна им е батерија, која со тек на времето се празни и мора да се менува. Така, пациентите се изложуваат на инвазивни процедури за да се смени батеријата на секои неколку години.
Сега, истражувачи од Универзитетот од Берн и Мичиген, развиле генијален начин да ја избегнат потребата од менување батерии во пејсмејкерите – тие предлагаат внатрешноста од механичкиот рачен часовник да се искористи за формирање на симбиотичка врска помеѓу срцето, механизмот на часовникот и пејсмејкерот.
Новата технологија која ја развиле ја користи кинетичката енергија на отчукувањата на срцето за да го напојува пејсмејкерот, создавајќи перфектен трансфер на енергијата – срцето го напојува уредот, кој го напојува срцето, што овозможува правилни отчукувања.
Швајцарските часовници користат автоматски движења за да функционираат – тоа значи дека енергијата за нивно функционирање се добива преку движењето на зглобот на кој што е часовникот. Малечок тег, наречен ротор, се движи заедно со зглобот, пренесувајќи ја енергијата врз федер кој механизмот на часовникот го користи за да функционира.
Истражувачите го адаптирале овој механизам за да функционира со отчукувањата на срцето, наместо со движење на зглобот, и кога го тестирале кај свињи, откриле дека може да генерира околу 6 микровати енергија, повеќе од доволно за напојување на пејсмеркер.
Тестирањата ќе продолжат и во наредните години додека уредот не се усоврши за комерцијално користење.