Истражувачи од Универзитетот во Манчестер развиле нов третман кој би можел да ја лимитира штетата предизвикана од мозочниот удар и да промовира заздравување на засегнатиот регион од мозокот, а лекот кој го искористиле за тоа е веќе клинички одобрен.
Објавената студија на научниците објаснува како тие го развиле третманот користејќи глувци одгледани за кај нив да се развие исхемичен мозочен удар, кој е најпревалентен тип на удари и кој се појавува кога артеријата која пренесува крв богата со кислород кон мозокот е блокирана. За кратко време откога глувците го преживеале ударот, тие биле третирани со IL-1Ra (интерлеукин-1 рецептор антагонист), лек против воспалување кој е веќе лиценциран за употреба во третмани за ревматоиден артритис.
Било забележано намалување на оштетувањето на мозокот кое типично се случува по мозочен удар, како и дека лекот предивикал неврогенеза (создавање на нови клетки) во реоните од мозокот кој претрпеле оштетувања. Глувците дури и ги повратиле моторните вештини кои ги изгубиле при ударот.
Инаку, според Центарот за контрола и превенција на болестите, мозочниот удар е 5-та водечка причина за смрт во САД, која засегнува околу 800 000 луѓе секоја година, и се случува кога протокот на крв кон мозокот е прекинат, вообичаено поради згрутчување на крв или парче маснотија откинато од артериите. Состојбата е екстремно опасна бидејќи мозочните клетки можат да изумрат за период од неколку минути по ударот, предизвикувајќи трајно оштетување на мозокот, па дури и смрт.
Иако експериментите се во раните фази од клиничките испитувања, истражувачите се надеваат дека во скоро време ќе започнат поголеми испитувања, како и тестирање врз луѓе.