Бета-таласемија е пореметување на крвта за кое нема лек и ги прати заболените целиот нивен живот. Единствена вистинска надеж за надминување на болеста е трансплантација или на матични клетки или на коскена срж, но овие процедури ретко се прават поради животно загрозувачкиот ризик кој доаѓа со нив.
Поради тоа, луѓето кои ја имаат болеста мора целиот живот да добиваат трансфузии и грижа од специјалист, а покрај тоа е и генетска па така децата кои ја имаат наследено од родителите може да развијат анемија, згрутчување на крвта, деформирани коски, жолтица, и разни други пореметувања.
Сега, за првпат во светот тим научници од Sun Yat-sen универзитетот со едитирање на гени ја исправиле грешката во ДНК-то која ја предизвикува оваа состојба, а тоа го извеле во човечки ембрион.
Тимот користел техника позната како „хемиска операција“ т.е „базно едитирање“ за да ги изменат фундаменталните градежни блокови на ДНК-то, поправајќи ја единечната грешка од три билиони „букви“ кои го составуваат нашиот генетски код со конвертирање на една ДНК база во друга. Успехот на процедурата се должи на фактот дека ова пореметување на крвта потекнува од промена на само една база во генетскиот код на човекот, која што била успешно поправена.
Процедурата била направена врз лабораториски ембриони кои не биле имплантирани, меѓутоа резултатите кои таа ги ветува се бесценети.
Околу две третини од познатите човечки генетски варијации асоцирани со болести се мутации токму од овој вид, што значи дека оваа процедура би помогнала во нивно елиминирање.
Иако клиничките тестирања не се во блиската иднина, оваа работа дефинитивно претставува чекор напред во иднината во која буквално би можеле да отстрануваме болести од човечки ембриони, па дури и од сопствените тела.