Булозната епидермолиза е ретка генетска болест која предизвикува кожата низ телото да создава болни плускавци на најмал допир, а за неа нема лек.
Сега, третман развиен од италијански научници би можел потенцијално да ги трансформира животите на илјадниците луѓе со оваа состојба, бидејќи со него тие успеале да реконструираат 80% од епидермисот на заболеното момче со помош генетски модифицирани кожни клетки.
Техниката вклучува ставање на кожни графтови од генетски модифицирана кожа врз дермисот – ткивото под надворешниот слој на кожата.
Тимот воден од истражувачите на матични клетки Мишел Де Лука од универзитетот во Модена и Реџо Емилија, вели дека нивната техника е живото-спасувачка регенерација на скоро целиот епидермис.
Пациентот бил 7 годишно момче кое во болница било примено во јуни 2015 со плускавци и лезии по целото тело поради кои изгубило 80% од кожата.
Истражувачите земале кожни клетки од здравата кожа од неговото тело, и од нив создале протеински култури кои биле генетски модифицирани да ја немаат мутацијата одговорна за неговата состојба – во овој случај, варијација на генот LAMB3. Потоа, од нив биле изработени трансгенски епидермални графтови кои во тек на 3 операции ја замениле изгубената кожа на детето со нов здрав епидермис.
Во наредните 21 месеци по последната операција, пациентот скоро целосно закрепнал, а неговата нова кожа немала плускавци и реагирала на стрес како и нормалната.
Потребни ќе бидат уште прегледи за да научниците се осигураат дека неговата кожа ќе остане здрава како што ќе старее, но како и да е, се работи за третман кој многу ветува.