Пациентите со сериозни гастроинтестинални заболувања како Кроновата болест, улцеративен колитис или синдром на нервозно дебело црево, често пати треба да испробаат по неколку скапи третмани пред да го пронајдат оној кој функционира за нив. Ваквите лекови потоа знаат да предизвикаат болни несакани ефекти или да не се ефективни.
Сега се тестира нова алатка наречена „црево во чип“ која на пациентите би им ја заштедила сета оваа болка и трошоци.
Според студија на истражувачи од медицинскиот институт за регенеративна медицина во Бостон, клетки на цревната обвивка креирани од матични клетки на возрасни индивидуи може да се стават во чип и да ја емулираат состојбата на она што се случува внатре во телото на човекот.
Така, наместо тестирање на лекови врз пациенти, тие би можеле да се тестираат на ваквите чипови, заштитувајќи го пациентот од непотребното искусување на негативни несакани ефекти.
Не само што ваквото „црево во чип“ би им овозможило на истражувачите подобро тестирање на лекови, туку би им дало и повеќе контрола во студиите на овие клетки. Бидејќи тие се наоѓаат во контролирана околина, истражувачите полесно може да студираат каква интеракција тие имаат со имуните и крвните клетки и подобро да ја разберат нивната функција.
Дополнително, истите ќе им овозможат на докторите да ја студираат цревната обвивка на пациентот без потреба од инвазивни хируршки методи за земање на примерок, бидејќи ќе може да ја создадат од неговите матични клетки, и врз неа да тестираат потенцијални терапии.