Замислете постојано да мора да се грижите нешто што сте го изеле да не ви предизвика отекување на грлото при што нема да може да дишете или запирање на срцето.
Тоа е реалноста која луѓето со силна алергија на кикирики ја живеат секојдневно, бидејќи нивните тела лансираат неконтролирани имунолошки реакции на најмала трага на протеин од кикирики во организмот.
Компанијата Aimmune Therapeutics е моментално во 3-тата фаза на клиничкото тестирање на нивните капсули наречени AR101, кои содржат прочистен протеин од кикирики кој може да го истренира телото драстично да ја намали алергиската реакција.
Учесниците во ова тестирање сега засега безбедно можеле да толерираат и до 30 пати поголема доза од алергенот, во споредба со дозата пред да започне тестирањето.
Студијата вклучувала 496 деца на возраст од 4 до 17 години со алергии толку силни да не можеле да внесат повеќе од 30 милиграми протеин од кикирики во организмот без да искусат сериозно опасни ефекти. Колку за споредба, една кикирика содржи 250 до 350 милиграми од овој протеин.
На половина од децата дневно им биле давани AR101 пилули чија доза се зголемувала до 300 милиграми до 22-рата недела, а на која останале во наредните 6 месеци, додека другата половина земала плацебо пилули.
По околу 48 недели, 67.2% од децата кои земале AR101 можеле да толерираат единечни дози до 600 милиграми, или 1043 милиграми за 2.5 часа, а 50.3% од нив толерирале и до 1000 милиграми протеин од кикирики (2043 милиграми за 3 часа).
Моментално, тие продолжуваат да ги земаат пилулите со различни дози за да им се аклиматизира имунолошкиот систем, а доколку слични резултати се добијат и во идни студии (кои се планираат и врз возрасни), AR101 наскоро може да биде првиот одобрен лек за превенција на алергии.