Нова студија поврзана со ефикасноста на т.н „вештачки панкреас“ сугерира дека се работи за огромен чекор во вистински правец за луѓето со дијабетес кои имаат потреба од постојано следење на нивото на гликоза во крвта.
Во систематска рецензија на сите докази, тим воден од истражувачи од Аристотел универзитетот во Солун евалуирал 41 студија за безбедноста и ефикасноста на два вида вештачки панкреас користени од повеќе од 1000 доброволци, при што било заклучено дека поминувале 10% повеќе време со здрав распон на ниво на гликоза во крвта во било кој 24-часовен период.
Дијабетесот е состојба која на телото му го отежнува менаџирањето на шеќерот во крвта, дали поради проблеми со создавање инсулин потребен на клетките за да ја апсорбираат глукозата (тип 1) или инсулинска резистентност (тип 2).
Дијабетичарите со тип 1 мораат постојано да го следат нивото на шеќерот во крвта и да внимаваат на исхраната, константно внесувајќи специјално пресметани дози инсулин. Иако ова во принцип звучи едноставно, во реалноста се работи за процес со кој е скоро невозможно да се одржува перфектното ниво на гликоза, бидејќи постојат многу варијабли кои тоа го оневозможуваат.
Модерната технологија и овие „вештачки панкреаси“ тоа го прават автоматски со пумпи кои ја вбризгуваат точната доза во точниот период од денот, значително олеснувајќи им го животот на дијабетичарите.
Иако првичните резултати се исклучително добри, дефинитивно ќе бидат потребни дополнителни, поквалитетни студии – на пример, во овие ниедно од испитувањата не е направено врз деца под 5 години