Научниците сметаат дека можеби го откриле потеклото на аутизмот. Според нова студија, ова пореметување може да е предизвикано од имање на премногу мозочни конекции, т.е синапси.
Според Азад Бони од невролошкиот оддел при универзитетската школа за медицина во Сент Луис, зголемениот број на синапси креира несоодветна комуникација помеѓу невроните во мозокот која предизвикува потешкотии во учењето, иако сè уште не се знае како.
Пореметување од аутистичниот спектар (ASD) е вообичаена невроразвојната состојба која ја има еден од 68 луѓе во САД, а генерално се смета дека постои генетски аспект на ASD (често го имаат повеќето во фамилијарното дрво), иако улога игра и животната средина.
Неколку гени се поврзани со луѓето со аутизам – 6 од нив се наречен убиквитин лигази и се одговорни за закачување на молекуларни тагови наречени убиквитини на протеините. Описно кажано, тие функционираат како менаџери кои на своите вработени (остатокот од клетката) им кажуваат како да се однесуваат со обележаните (тагирани) протеини – дали треба да ги насочат во друг дел од клетката, дали треба да ги „отпуштат“ и сл.
Некои експерти сметаат дека индивидуите со аутизам имаат генетска мутација која спречува една од нивните убиквитин лигази правилно да функционира, а за да ова го испитаат истражувачите го отстраниле убиквитин генот RNF8 од невроните во церебелумот кај млади глувци. Оние кои имале недостаток од генот развиле вишок синапси, кои како резултат влијаеле на нивната способност за учење.
Овие глувци имале 50% повеќе синапси од останатите кај кои не бил „чепнат“ RNF8 генот. Научниците потоа ги измериле електричните сигнали во невроните и откриле дека тие биле двојно посилни во споредба со оние кај клетка која функционира нормално.
ASD влијае на јазикот, вниманието и движењето – вештините во кои церебелумот игра есенцијална улога – а тестираните глувци чиј RNF8 ген бил отстранет ги покажале токму овие симптоми.
Потребни ќе бидат уште многу експерименти и тестирања за да се потврди оваа нова хипотеза, а доколку таа се покаже како точна тоа ќе значи создавање на нови третмани.