Техниката на 3D принтање наскоро на некои луѓе би им овозможила повторно да гледаат.
Научниците од Њукесл универзитетот развиле „био-мастило“ кое им овозможува успешно да испринтаат човечки рожници.
Рожницата е најиспакнатиот слој во предниот дел на окото, која доколку е оштетена од повреда или болест, предизвикува проблеми со видот па дури и слепило. Единствениот третман за нефункционирачка рожница е нејзино трансплатирање, но и покрај тоа што од оваа процедура потреба имаат 15 милиони луѓе, само 44 000 трансплантации се прават секоја година.
За да ја креираат 3D принтаната рожница, тимот истражувачи искомбинирале две хемикалии – алгинат и колаген – а потоа со не многу скап 3D принтер ја конструирале за помалку од 10 минути. Тие користеле скен од окото на личноста во која таа ќе биде вградена за да ги одредат димензиите, со што перфектно би се вклопила во однос на големината и формата на окото.
Откога била испринтана, во рамката од „био-мастилото“ биле вметнати матични клетки кои кога созреале ја создале самата рожница, додека останатите делови служеле само како поддршка на матичните клетки. 83% од кератоцитите (специфични видови на клетки на рожницата) биле сè уште живи по принтањето – резултат кој индицира дека ваквите рожници би можеле да ги заменат човечките.
Како и на сите други успешни експериментални процедури од овој вид и на оваа ќе и бидат потребни неколку години додека е расположива за сите.