Најмалиот хируршки робот во светот е подготвен да оперира

До крајот на 2018, хирурзите во Обединетото Кралство (UK) би можеле да имаат нов асистент во хируршката сала – Versius, најмалиот хируршки робот во светот.

Креиран од CMR Surgical, тој се состои од 3 роботски раце прицврстени на мобилен уред со големина на барско столче и е контролиран од хирург преку контролен панел со чија помош му ги движи рацете за време на процедури кои се одвиваат низ малечки отвори на телото.

Компанијата е во процес на одобрување на Versius од регулаторите во UK за да може легално да „работи“ во хируршките сали, што потенцијално може да се случи пред крајот на оваа година.

Докторите често се наоѓаат во неудобни позиции кога ги прават ваквите операции. За да ги насочат нивните инструменти каде што треба да се наоѓаат, тие треба да се превиткуваат во чудни агли и да останат во таа позиција подолг временски период. Versus би им овозможил да ги избегнат овие често пати болни позиции со тоа што маневрирањето на инструментите ќе го прави наместо нив.

За пациентите, ваквите операции нудат многу предности во однос на класичните операции од отворен вид. Тие ја намалуваат шансата пациентот да развие хернија за 50%, побаруваат многу помалку лекови против болка по операцијата, и го намалуваат процентот на инфекции.

На еден хирург му требаат во просек 60 до 80 часа вежбање како рачно да врзе хируршки чвор внатре во пациентот низ малечок отвор. Со Versius, таа процедура хирургот може да ја научи за само 30-тина минути.