Истражувачите идентификувале сосема нов „микро-орган“ во имунолошкиот систем кај луѓето и глувците, прво откритие од овој вид во последните декади, кој на научниците би можел да им отвори пат за развивање на поефективни вакцини во иднината.
Вакцините се базирани на векови истражувања кои покажуваат дека штом еднаш телото ќе се сретне со специфичен вид инфекција, со истата може подобро да се справува наредниот пат кога ќе ја добие. Новото истражување сугерира дека микро-органот би можел да е клучот за тоа како нашето тело го „помни“ имунитетот.
Истражувачите од Гарван институтот за медицински истражувања во Австралија откриле тенки рамни структури врз лимфните жлези од имунолошиот систем кај глувците, кои ги нарекле SPF.
Овие функционираат како биолошки „штабови“ за планирање на напад врз инфекциите и кај глувците се појавувале само кога нивните имунолошки системи се бореле против инфекции со кои веќе претходно се имале справено.
Истите SPF биле забележани и на човечките лимфни јазли, сугерирајќи дека и нашите тела реагираат на истиот начин.
Според истражувачите, кога телото се бори со бактерии чиј број се дуплира секои 20 до 30 минути, секој момент е важен и поради тоа од огромно значење е имунолошкиот систем да реагира брзо за да ја спречи инфекцијата бидејќи во спротивно може да настапи смрт. Вакцините се исклучително важни бидејќи го тренираат имунолошкиот систем за да може брзо да создаде антитела кога ќе се појави некоја инфекција, а досега научниците не знаеле каде и како точно тоа се случува.
Научниците сметаат дека SPF-ата не биле забележани досега бидејќи традиционалната микроскопија анализира тенки 2D парчиња ткива, бидејќи и самите тие се исклучително тенки и се појавуваат само привремено.
Во овој случај, тимот истражувачи направил еквивалент на 3D филм од имунолошкиот систем во акција, со што била забележана колекција на многу различни видови имунолошки клетки во овие SPF-а. Во нив биле вклучени и клетките од видот Memory B, кои на имунолошкиот систем му кажуваат како да се бори против одредена инфекција, а кои потоа се претвораат во плазма клетки кои создаваат антитела кои всушност се борат со неа.
SPF-aта се стратешки поставени на локации каде бактериите би напаѓале и ги содржат сите состојки да се одбранат од инфекцијата.
Сега откога знаеме како телото се бори против инфекциите, би можеле да ги унапредиме техниките со кои се изработуваат вакцините. Сегашните вакцини се фокусираат на создавање Memory B клетки, но оваа студија сугерира дека процесот би можел да биде поефективен доколку се открие начинот на кој што тие се трансформираат во плазма клетки преку SPF-ата.
Сето ова е потсетник дека сè уште постојат многу мистерии скриени во нашите тела, иако научниците во нив гледаат над 300 години.