Микробите кои живеат во човечкиот стомак се одговорни за многу работи, влијаејќи на нашето здравје, гени, па дури и емоции.
Научниците постојано откриваат нови детали околу обемот и влијанието на човечкиот микробиом, а последните докази сугерираат дека можеби постои посебен „микробиом на човечкиот мозок“ кој ни се наоѓа во главата.
Важно е да се напомене дека ова најново истражување сè уште не е рецензирано од други научници, а доколку се покаже како точно тоа ќе претставува едно значајно обележје во науката.
Во новото истражување, тим воден од невроанатомистот Розалинда Робертс истражувал примероци мозок земени од 34 мртви луѓе, од кои половината имале шизофренија, а другата половина биле сметани за здрави пред нивната смрт.
Била извршена анализа на разните секции мозок за идентификација и квантификација, а во сите случаи биле пронајдени различни количини на бактерии во форма на прачка, кои содржеле капсула, нуклеоид, рибозоми и вакуоли.
Густината на овие бактерии варирала во зависност од тоа во кој мозочен регион се наоѓале, а истите биле пронајдени и во клетките наречени астроцити кои играат важна улога во начинот на кој што невроните комуницираат.
За тоа како бактериите се нашле во мозокот, истражувачите сè уште не знаат, но шпекулираат дека најверојатно се пренеле преку крвотокот, пронаоѓајќи дом во аксоните во мозочната бариера помеѓу крвта и мозокот.
Овој бактериски феномен го нема само во човечките мозоци, бидејќи мозочен микробиом бил откриен и во мозоците на здрави глувци.