Ново истражување покажало дека парализирани пациенти може да контролираат таблет со помош на имплант во вид на чип поврзан во нивниот мозок. Овој мозочно-компјутерски интерфејс на субјектите им овозможил да мрдаат курсор и да кликаат со помош на нивните мисли.
Трите пациенти врз кои била тестирана оваа технологија биле тетраплегичари, неспособни да ги движат екстремитетите. Два од нив имале амиотропична латерална склероза (ALS), а третиот повреда на ‘рбетниот столб. Со помош на овој интерфејс, тие можеле да користат меил, програми за четување, да пуштаат музика и вклучуваат апликации за видео стриминг, како и да купуваат онлајн, па дури и да свират на виртуелно пијано.
Чипот кој им бил имплантиран е со големина на малечка пилула и е сместен во моторниот кортекс во мозокот. Сензорот ја регистрира нервната активност поврзана со посакуваните движења, а потоа таа информација ја декодира и испраќа кон надворешни уреди како што се компјутерите или таблетите.
Овој нов пристап ќе им овозможи на парализираните луѓе полесно да комуницираат со својата фамилија и пријателите, како и драматично да го промени квалитетот на животот на многу луѓе.