За прв пат во историјата, во Бразил е родено бебе од матка донирана од починат донор.
Здравото женско бебе било родено со царски рез во болница во Сао Пауло, а нејзината мајка имала трансплантирана матка по што следело ин витро оплодување само 7 месеци по трансплантацијата.
Мајката, 32 годишна жена, била родена без матка поради MRKH (Mayer-Rokitansky-Küster-Hauser) синдромот, состојба која ја имаат една во 4500 жени. Трансплантацијата изведена во септември 2016-та траела 10.5 часа, а донорот била 45 годишна жена која починала од мозочен удар.
Мајката и детето ја напуштиле болницата само 3 дена по породувањето и сега засега сè е во ред и со двете.
Користењето на органи од починати донори нуди нова опција за жените кои имаат проблем со матката, а од болницата изјавиле дека се авторизирани да направат уште две операции и се фокусирани на подобрување на протоколот со цел да продолжат со изведување на оваа процедура.
Досега од матка донирана од жив донор се родени 11 деца, од кои првото во Шведска во септември 2013-та. Ова е првото бебе родено од матка од починат донор, како и прва трансплантација од ваков вид во Латинска Америка.
Лошата страна на оваа операција се големите дози на имуносупресивни лекови и умерени нивоа на загуба на крв, со кои докторите требало да се справат.
Истражувачите велат дека трансплантите од починатите донори имаат повеќе предности од оние од живите. Една од најочигледните е дека докторите не треба дополнително да се грижат и за здравјето на донорот, а и нивниот избор е поголем и помалку ограничувачки во споредба со живите донори бидејќи тие се најчесто од кругот на фамилијата или екстремно блиски пријатели.