Деновиве започна големо клиничко тестирање на нова форма на машка контрацепција во форма на гел. Многу жени не можат да користат хормонална контрацепција, а машките контрацептивни методи се ограничени на вазектомија и кондоми, па така секоја нова контрацептивна метода е добредојдена.
Гелот се мачка на грбот и рамениците еднаш во денот, а содржи комбинација од соединението прогестин и тестостерон кои се апсорбираат преку кожата.
Прогестинот ја редуцира продукцијата на сперма до „ниски до непостоечки нивоа“, додека тестостеронот има функција да го одржи нормалниот сексуален порив и останатите функции кои зависат од овој хормон.
Истражувачите планираат да вклучат 420 парови во тестирањето на овој гел на кој се работи повеќе од една декада и со кој се направени многу мали човечки студии од 2009-та, постојано рафинирајќи го балансот на хормоните за да се подобри неговата ефективност и безбедност.
Досега над 200 мажи го имале тестирано без никакви сериозни несакани последици, за разлика од некои претходни обиди за развивање на машка контрацепција чии несакани последици биле оштетување на црниот дроб и слично.
Ова клиничко тестирање нема целосно да заврши сè до 2022-ра, а потоа ќе следат уште студии со илјадници мажи пред гелот да добие одобрување од FDA.