Идентификувани се биомаркери за сигурно тестирање за мистериозната и често пати онеспособувачката болест фибромиалгија.
Луѓето со оваа болест (која ја има и Лејди Гага) се претежно жени, а симптомите се хронични болки во многу делови од телото, кои некогаш се толку силни да го претвораат секојдневието во кошмар. Дијагнозата на оваа болест е исклучително тешка, бидејќи разликите помеѓу болките предизвикани од фибромиалгијата и некои други болести се често пати суптилни.
Сега, докторот Кевин Хекшо од државниот универзитет во Охајо вели дека е направен крвен тест за нејзино детектирање, кој сè уште не е подготвен за комерцијална употреба, а кој дијагнозата ја дава врз база на комбинација од крвни молекули кои ги имаат само оние со болеста.
Неговото тестирање било направено врз 50 луѓе дијагностицирани со фибромиалгија и 71 кои имале симптоми од 3 други хронични болести. Без да се знае која болест некој ја имал, тимот на Хекшо користел вибрациска спектроскопија на крвни протеини и киселини за да ги издвојат оние со фибромиалгија од другите.
Истражувачите сметаат дека тестот може да ја квантифицира и сериозноста на болеста, што би помогнало во одредување дали третманите за неа функционираат. Хекшо се надева дека во следните 5 години ќе успее да го усоврши тестот, да се скрати времето потребно за дијагностицирање како и на неговата цена.
Фибромиалгијата често пати се влошува со тек на времето, а на многумина кои ги имаат нејзините симптоми им се препишуваат опиоиди, во недостаток на правилна дијагноза.