Со години, научниците се обидуваат да развијат безбедна и ефективна верзија на контрацептивна пилула за мажи, а оваа недела научници од LA BioMed (институт за биомедицински истражувања во Лос Анџелес) во САД објавија дека експерименталниот орален лек наречен 11-beta-MNTDC е прогласен за безбеден, според резултатите од првата фаза на клиничкото тестирање врз 40 мажи.
За потребите на тестирањето, биле регрутирани 40 здрави мажи од кои 30 од нив 28 дена пиеле мала или голема доза 11-beta-MNTDC, додека останатите 10 пиеле плацебо.
11-beta-MNTDC е модифицирана форма на тестостерон кој има и прогестациски (блокирање на спермата) и андрогени (балансирање на хормони) карактеристики.
Бидејќи продукцијата на тестостерон се „исклучува“ во тестисите, андрогените карактеристики делуваат во остатокот на телото одржувајќи ја длабочината на гласот, либидото, функцијата и мускулната маса.
Партиципантите кои го пиеле лекот не демонстрирале сериозни несакани ефекти, но покажале значително намалено ниво на два хормони наречени LH и FSH, потребни за продукција на сперма.
Во овој експеримент примарно се тестирала безбедноста на 11-beta-MNTDC, а не контрацептивниот ефект. Во однос на сексуалниот ефект, 5 мажи рекле дека почувствувале мали промени во либидото, додека двајца искусиле помала еректилна дисфункција.
Истражувачите планираат дополнителни испитувања на 11-beta-MNTDC, како и на функционално слична хемикалија наречена dimethandrolone undecanoate (DMAU).
Во зависност од тоа како ќе се одвиваат идните експерименти, тимот научници тврди дека безбедна машка хормонална пилула би можела да се појави на пазарот за околу 10 години.