Досега се сметало дека чувството за болка кога, на пример, ќе се прободеме со нешто остро, потекнува од експонираните нерви во кожата, но сега научниците откриле дека болката можеби се чувствува и преку претходно непознат орган.
Истражувачите од универзитетот Каролинска во Шведска го идентификувале овој неочекуван детектор на болка кај глувците – тие откриле дека Шван клетките – кои ги штитат и подржуваат невроните – се поврзуваат едни со други под надворешниот слој на кожата (епидермисот) за да формираат мрежеста структура, а одредени нивни делови навлегуваат во епидермисот.
Заедно со нервните клетки кои детектираат болка, овие клетки функционираат како сензорен орган кој реагира на механичка болка – како онаа предизвикана од остри предмети, притисок, и горење.
За да тестираат дали ново идентификуваните Шван клетки навистина придонесуваат за детектирање на болка, тимот истражувачи користеле генетски модифицирани глувци кај кои исклучиво тие специфични клетки можеле да се активираат со помош на светлина. Било заклучено дека кога биле експонирани на светлина, глувците покажувале знаци на болка, и тоа без нивните нерви или останати видови на Шван клетки да бидат стимулирани од болка.
Кога новите Шван клетки биле генетски блокирани, глувците покажале намалена чувствителност на механички предизвикана болка, но не и на термално предизвикана.
Истражувачите сметаат дека иако присуството на вакви клетки треба да се потврди и кај луѓето, многу е веројатно дека тие постојат – особено поради фактот што сите други познати сензорни органи кои ги имаат глувците, ги имаат и луѓето.
Доколку тоа се покаже како точно, ова откритие би можело да отвори пат за создавање на нови третмани за оние кои искусуваат одредени форми на постојана болка.