За прв пат, CRISPR технологијата за уредување на гени е искористена во третман на пациент кој е ХИВ-позитивен. Иако тој целосно не бил излечен од болеста, истражувачите сметаат дека новата процедура е безбедна и ветувачка.
Процедурата била извршена врз 27 годишен пациент со ХИВ, кој исто така имал и рак на крвта познат како акутна лимфобластна леукемија. Со помош на CRISPR, било изменето ДНК на матичните клетки за да се оштети CCR5 генот – потребен за ХИВ да пенетрира во имунолошките клетки. Тимот истражувачи потоа користел хемикалии и радијација за отстранување на коскената срж на пациентот за да истата може да биде заменета со модифицираните матични клетки, кои во телото биле ставени преку венска инфузија.
Сега засега, леукемијата е сè уште во ремисија и нема никакви несакани ефекти од третманот, а 19 месеци подоцна, генетски модифицираните клетки сè уште се во телото на пациентот.
Иако со третманот не било редуцирано нивото на ХИВ (пациентот сè уште е на антиретровирусни лекови), авторите на студијата веруваат дека со подобрување на ефикасноста на техниката, би било возможно ХИВ вирусот комплетно да се отстрани од телото.
Научниците постојано истражуваат како CRISPR може да се користи за третирање на разни состојби, од канцери до крвни нарушувања, па до мускулна дистрофија кај кучињата.