Молекуларен дефект кој се чини дека е универзален кај сите пациенти со Паркинсоновата болест и оние со голем ризик од нејзино развивање би можел да помогне во детектирање на болеста пред да се манифестираат симптомите, како и во можноста да се сопре нејзината прогресија.
Научниците исто така идентификувале соединение кое ги елиминира дефектите во клетките кај пациентите со Паркинсонова болест, кое кај животинските модели на болеста ја спречило смртта на невроните чие губење се случува поради неа.
Паркинсоновата болест во 5%-10% случаи се наследува како резултат на познати генетски мутации, а во преостанатите причината за неа се комплексни интеракции на бројни непознати гени и фактори на животната средина.
Новооткриениот дијагностички маркер и третмани функционираат кај клетките кај пациентите од двата вида.
Болеста потекнува од мистериозното изумирање на група нервни клетки во мозокот, кои се поврзани со телесните движења. Овие неврони со потекло од мозочната структура позната како substantia nigra се познати како допаминергични бидејќи секретираат допамин, а додека личноста почне да манифестира симптоми на болеста, околу 50% од допаминергичните неврони од substantia nigra веќе се изумрени.
Истражувачите имаат теорија дека она што ги предизвикува да изумрат се токсичните нуспродукти од генерирањето на енергијата во клетките, наречени слободни радикали кои предизвикуваат клеточно оштетување и се екстремно штетни за митохондријата.
Познато е дека Паркинсоновата болест вклучува дефект во митохондријалната функција – колку повеќе една клетка треба да работи, толку повеќе енергија треба митохондријата да произведе, а со тоа и шансите да „прегори“ се поголеми.
Нашите клетки имаат техника за „чистење“ на овој митохондријален „отпад“ – серија протеини кои го изнесуваат од клетките, пред кој што процес треба да отстранат молекул наречен Миро кој има интеракција со митохондријата (здравата или оштетена) и ја приклучува кон мрежата од која треба да се отстрани отпадот.
Во новото истражување, било утврдено дека клетките на пациентите со Паркинсонова болест ја немаат способноста да го отстранат Миро од оштетената митохондрија, а во дополнителни истражувања биле издвоени 11 молекули од база од 6,835,320 малечки молекули со кои тоа можело да се постигне, при што едно соединение се покажало како успешно во сите тестови.
Научниците се надеваат дека тоа соединение би можело да се дава на луѓето кои биле тестирани како позитивни за дефектот за отстранување на Миро и кои сè уште немаат развиено симптоми на Паркинсонова болест, за да тие воопшто и не им се развијат.
За таа цел, била формирана компанијата CuraX која ќе го продолжи и забрза развивањето на овој потенцијален третман.