Идентификувани мозочни мрежи поврзани со ризикот од самоубиство

Со рецензија на 131 научни студии на мозочни слики можеби е откриена поврзаност помеѓу одредени мозочни региони и зголемениот ризик од самоубиство.

Дали идентификуваните мозочни мрежи се причина за самоубиствата или тоа се други фактори не е разјаснето, но како и да е, заклучоците од ова истражување би можеле да доведат до подобрена идентификација на оние подложни на ризикот од самоубиство.

Самоубиството е една од најголемите причини за смрт низ светот и има огромен ефект на животниот век бидејќи често е извршено од инаку здрави луѓе. Според еден од авторите на студијата (Др. Ен-Лора ван Хармелен од универзитетот во Кембриџ), не знаеме скоро ништо зошто некои индивидуи се поподложни на самоубиство, бидејќи знаеме многу малку во врска со она што се случува во мозокот, зошто постојат разлики помеѓу половите и зошто претежно младите луѓе се подложни на самоубиство.

Анализирајќи истражувања на мозочни слики од над 12 000 луѓе кои биле извршени во изминатите 2 декади, биле откриени 2 системи т.е конекции помеѓу мозочни региони чија структура и функција се чини дека е поврзана со поголема шанса за обид за самоубиство, како и со зголемени самоубиствени мисли. Една од овие мрежи ги поврзува областите од мозокот вклучени во емоциите, а авторите на студијата сметаат дека разликите во овој регион кај луѓето со историја на обиди за самоубиство ја намалуваат контролата врз негативните мисли и депресијата. Другата мрежа ги поврзува областите вклучени во носењето на одлуки, а истражувачите шпекулираат дека интеракцијата помеѓу овие две мрежи креира особено ризична ментална состојба – иако се потребни уште многу истражувања за да тоа се потврди.