Лековите против болки кои ги користат милиони луѓе, се поврзани со зголемен ризик од неправилна работа на срцето, што може да доведе до мозочен удар. Зголемениот ризик од развивање на атријална фибрилација може да изнесува дури и до 85%, предупредуваат холандските научници.
Атријална фибрилација – водечката причина за прв мозочен удар – се случува кога горната срцева комора го губи правилниот ритам на чукање и чука побрзо од нормалното, што доведува до згрутчување на крвта.
Многу луѓе употребуваат лекови како што е ибупрофенот. Во истражувањето кое траело 13 години, се следело здравјето на срцето кај 8.423 луѓе. Просечната возраст на испитаниците била 68, а повеќе од половина биле жени. Во тоа истражување, 857 испитаници развиле атријална фибрилација, од нив 261 никогаш не користеле лекови, 554 користеле но во периодот пред испитувањето, додека за време на испитувањето 42 испитаници користеле лекови против болки. За време на ова истражување, земени се во предвид возраста, полот и срцевите проблеми.
Користење на лекови против болки, 30 дена пред поставувањето на дијагнозата, било поврзано со 85% зголемен ризик од атријална фибрилација. Се смета дека овие лекови може да допринесат до проблеми со ритамот на срцето, бидејќи го зголемуваат крвниот притисок поради задржување на течностите во телото.
- Нашите резултати сугерираат дека зголемен ризик е при почетокот на лечењето и дека со тек на времето може да се намали, изјави Бруно Стикер, дел од ова истражување.
Истражувачите исто така открија дека освен што се зголемува ризикот за мозочен удар, се зголемува и ризикот за срцев удар. Поради тоа, за секој еден лек кој сметате дека треба да го консумирате, најпрво консултирајте се со вашиот доктор.